Los Ciquitrinos van grabar el so primer discu

Había munchu aficionáu al folk asturianu que venía demandando dende va cuantayá qu'una de les bandes más célebres de música asturiana grabara discu. Y por fin, tres de muncho pensalo, Los Ciquitrinos van ponese esti mes d'abril a trabayar nel so primer trabayu discográficu, mezclienda d'estudiu y directu que s'albidra como una de les propuestes discográfiques más interesantes d'anguaño.

Los Ciquitrinos vienen garrando nome y fama pelos escenarios asturianos dende que se formaren nel añu 2000, al xuntase músicos de distintes formaciones y d'estremaos estilos musicales, anque los más d'ellos de formaciones folk, pa montar un grupu que revindicará la formación d'orquestina o de bandina, como se quiera llamar. La música de la banda ta concebida pal baille y pa montar folixa, too ello arreyao al bon humor al traviés de les lletres de los cantares del grupu arriendes de dalguna hestoria rara que tienen a bien contar ente cantar y cantar.

Por eso'l grupu suena a bandina asturiana, tocando temes de la tradición asturiana o composiciones propies con un inconfundible estilu propiu, pero de sópitu'l so repertoriu puede dar un reblagu y sonar a orquestina o fanfarria rumana, versatilidá que-y permite la concepción musical de los componentes y la variedá y cantidá d'instrumentos y instrumentistes, percusiones, metales, baxu, curdión, clarinete y gaita.

El mediu natural de Los Ciquitrinos ye l'escenariu, y a asina'l grupu lleva dende esi añu 2000 tocando por bien d'escenarios fuera y dientro d'Asturies, en nueches folk y festivales. Pero depués de tantu tiempu, ya empezaba a ser necesario que'l grupu espeyara nun cd lo que fai nel escenariu, anque esta de mano nun paez una xera fácil.

Poro, col envís de que'l discu s'avere lo máximo posible a la esencia del grupu, parte va grabase en directo, los díes 27 y 28 d'abril a les 22:00 hores nel local de la Fundación de Música Moderna d'Avilés.Grabación pa la que'l grupu espera contar cola collaboración del so públicu pa lo que conviden a tol mundu a participar nesos conciertos, porque qué sedría de Los Ciquitrinos ensin esa complicidá col públicu. La otra parte del discu va grabase nos estudios TUTU en Corvera col trabayu del productor Sergio Rodríguez. El grupu quier tener el cd na cai pa enantes de qu'entame'l branu, feches nes que Los Ciquis van volver a xubir a los escenarios p'animar otra vuelta'l prau que se-yos ponga per delantre.