Gaspar Llamazares enfótase nes posibilidaes electorales d’IX n’Asturies

El coordinador xeneral federal d'Izquierda Xunida, Gaspar Llamazares, declaró ayeri que la coalición que representa tien posiblemente n'Asturies "les meyores perspectives" con vistes a les elecciones del 27 de mayu, sorrayando que n'Asturies IX tien un nivel de votu "superior" al de tol estáu.

El secretariu d'IX fexo estes declaraciones nuna entrevista a Radio Nacional - RNE na que tamién aseguró que la so fuerza política diba ser "la garantía d'una mayoría y un gobiernu de la izquierda n'Asturies".

Llamazares albidra bonos resultaos nes elecciones asturianes independientemente de los problemes internos del PCA asegurando de fechu que "vamos a estes elecciones con un altísimu nivel d'alcuerdu na inmensa mayoría de les candidatures y con un bon nivel de cohexón na Dirección Federal y nes direcciones de les federaciones".

Gaspar Llamazares participó tamién ayeri nuna visita al conceyu de Casu xunto col candidatu a la presidencia d'Asturies y coordinador d'IX Asturies Jesús Iglesias, qu'aseguró que l'embalse de Caliao nun va construyise en casu de qu'IX tenga la llave de la gobernabilidá d'Asturies.