Xuristes pol asturianu denuncia'l "llingüicidiu" del asturianu

Los xuristes Xosé María Estrada Janariz y Xurde Blanco Puente presentaron ayeri nos locales de la Sociedá Cultural Xixonesa'l documentu "dictame sobre'l Conflictu Llingüísticu n'Asturies" un testu ellaboráu pol colectivu "Xuristes pol Asturianu" y que se resume nun decálogu nel que s'inxerten dellos puntos d'análisis llegal de la situación del asturianu xunto con una parte de conclusiones que lleva a los abogaos y profesores que componen l'asociación a segurar qu'existe una "delda cola llingua asturiana" que precisa de pagu.

Los xuristes llamaron muncho l'atención na so conferencia sobre l'incumplimientu de les disposiciones llegales que defenden l'asturianu y sobre la falta de definición de munches d'elles, especialmente l'artículu cuartu del Estatutu d'Autonomía d'Asturies, que calificaron de "buxu y revesosu" y la Constitución Española. Los ponentes de Xuristes pol Asturianu sorrayaron la importancia de llexislación pa la que nun se suel atender muncho, sorrayando nesti sentíu la Carta Europea de les Llingües, firmada por España y que garantiza una protección mínima pal asturianu.

Na so interesante ponencia, los miembros de Xuristes pol Asturianu esplicaron como l'entramáu de lleis que faen referencia al asturianu ta estráu de contradicciones a la hora de llevase a la práctica.

D'esta miente, anque "la llingua asturiana y el gallego-asturianu nel so ámbitu tán reconocíos xurídicamente" y anque la mesma Constitución española declara "patrimoniu cultural y oxetu d'especial respetu a toles llingues del estáu" al empar que la oficialidá estatal del castellanu y la de les demás llingües nos sos ámbitos, estos mandaos constitucionales nun se cumplen n'Asturies. Los Xuristes acusen a los poderes públicos de facer una interpretación discriminatoria de la llexislación y anuncien que'l cuartu de sieglu de discriminacion que lleva sufriendo l'asturianu namás pue iguase dende'l reconocimientu de los derechos y la discriminación positiva pa cola llingua.