La Oficina de Política Llingüística estrena la so web

La Oficina de Política Llingüística del Principáu d'Asturies (OPL) estrena esta selmana la so páxina web oficial. Esti estragal n'internet del departamentu que dirixe Ramón d'Andrés foi obra de la empresa Araz Net. La web de la Oficina de Política Llingüística va ofrecer información actualizao sobre toles actividaes que se faigan dende la institución, marcándose los oxetivos de posicionar a la Oficina n'Internet y ser un serviciu d'información de les distintes acciones y campañes que desarrolle.

Nesti sentíu, la difusión de les xeres y resultaos del trabayu de la Xunta de Toponimia o los conteníos y actividaes de la Selmana de les Lletres tienen un llugar relevante na web, que tamién dexa sitiu pa poner a disposición de los usuarios bases de datos con llexislación y información sobre cuerstiones llingüístiques o convocatories de subvenciones. La web de la OPLL quier ser tamién una ferramienta que faiga más amañoses les rellaciones ente la oficina y los ciudadanos, apautando una canal directa de contactu p'asesoramientu llingüísticu al ciudadanu. Otres organizaciones y entidaes que trabayen en collaboración cola OPLL, casu del Observatoriu de Política llingüística o la Rede de Normalización del Asturianu nos conceyos, tienen tamién sitiu acutáu nesta web.