IX y PP acusen al Gobiernu d'inxertar propaganda irregularmente nos medios de comunicación

Izquierda Xunida y Partíu Popular coincidieron n'acusar al presidente asturianu Vicente Álvarez Areces y a la conseyera de Cultura Ana Rosa Migoya, poles apaiciones de propaganda institucional en medios de comunicación asturianos presentando iniciatives y obres del Gobiernu. Pa IX l'actuación de los sos socios socialistes nel gobiernu ye un casu claru de "oportunismu y fraude de Llei" y una "clarísima violación de la Llei de Publicidá Institucional qu'apauta nel so artículu IV que nun se podrá promover o contratar comunicación institucional que tenga como finalidá rescamplar los llogros de xestión o los oxetivos alcanzaos pol gobiernu".

El PP, pela so parte, calificó de"escándalu" la "propaganda" del Gobiernu asturianu, que'l diputáu popular Fernando Goñi peritó en 39 inxertos de propaganda sobre los "llogros del Gobiernu" n'estremaos medios de comunicación, con un gastu que'l portavoz popular dixo que sedría de "más de 150.000 euros diarios sacaos de fondos públicos", dalgo que pal PP balta dafechu la Llei de Publicidá y Comunicación Institucional que promovió'l mesmu gobiernu". El PP declaró que ta dimpuestu a llevar los incumplimientos de la llei electoral énte la Xunta Electoral, lo mesmo qu'ente la Procuradora Xeneral o la xusticia ordinario si fuere preciso. Dambes fuerces polítiques censuraron que'l Gobiernu nun constituyera la Comisión de Comunicación prevista na Llei nin presentare l'informe añal d'actividá.