El BNG propón-yos a los conceyos asturianos planes de collaboración “pa defender los derechos de los falantes de gallegu”

La formación nacionalista gallega BNG presentó güei un "plan de choque" con 16 midies en defensa del empleg del gallegu n'alministración local. Parte de les midíes del plan refiérense al "gallegu esterior" y proponen que la Xunta de Galicia collabore con conceyos d'Asturies, Extremadura y Castiella y Lleón pa "facer efectivu l'exerciciu de los derechos llingüísticos de la población existente neses comarques".

El diputáu del BNG Bieito Lobeira presentó esta mañana esti plan, que ta pensáu en primer llugar pa dignificar el gallegu na comunidá vecina, onde aseguró qu'hai "presidentes de diputaciones provinciales y alcaldes que se ríen abiertamente de la llei" y que nun respeten l'usu del gallegu nin le formes toponímiques tradicionales, situación que xustifica la presentación d'esti "plan de choque" que pide que diputaciones y conceyos tengan la llingua gallega como referencia oral y escrita y qu'apauten "la ufierta positiva" n'atención al públicu, ello ye, que los funcionarios falen d'oficiu colos ciudadanos en llingua gallega. Ente les midíes del plan de choque conséñase tamién la solicitú de creación d'ordenances municipales de Normalización Llingüística y la creación de servicios de normalización que vaigan más allá de ser oficines de traducción de documentos.