L’autovía nueva ente Uviéu y Xixón va inaugurase la primer selmana de mayu

El desdoblamientu de l'antigua carretera AS-18 ente Uviéu y Xixón va echar a andar la primera selmana del mes de mayu. Los técnicos periten que la carretera nueva va quitá-y a la estragada autopista "Y" ente un 20 y un 30% del so tráficu actual. La vía, que va tener el nome oficial de AS-II, va tener un tráficu mediu de 35.000 coches y costó un total de 135 millones de euros, que'l Gobiernu asturianu va financiar al traviés de lo que se conoz como "portalgu na solombra" un procedimientu pol que la empresa constructora va recibir 3 céntimos d'euru por cada kilómetru qu'ande cada vehículu qu'entre a la vía. El recuentu del tráficu va facese dende'l centru de control del tráficu de l'autovía, que va tar en Llanera. L'autovía, que va conectar col Hospital Universitariu anguaño en construcción, tien pendiente pa poder inaugurase, a pocos díes de les elecciones, l'allumáu y la señalización.