Miles de persones salieron a la cai en defensa de Cándido y Morala

Miles de persones participaron ayeri na manifestación que se celebró en Xixón convocada pola "Plataforma contra la Represión y poles Llibertaes"contra la represión de los movimientos sindicales y sociales y en defensa de los sindicalistes de la Corriente Sindical d'Izquierdes (CSI) Juan Manuel Martínez Morala y Cándido González Carnero, condenaos a trés años de cárcele poles movilizaciones del sector naval. Delegación de Gobiernu peritó l'asistencia a la marcha en 2.000 persones, mientres que la organización calificó la marcha de "multitudinaria".

Na manifestación participaron colectivos de trabayadores afectaos pola reconversión industrial asturiana dende los años 80 del pasáu sieglu, participando na mesma dende colectivos d'Aceralia, Suzuki, Mina La Camocha o de los estremaos astilleros de Xixón que foron echando'l piesllu o menguando les sos plantiyes a lo llargo de les dos décades últimes. La manifestación, siguida ampliamente polos afiliaos y simpatizantes del sindicatu CSI, al que pertenecen Cándido y Morala, desarrollóse ensin la presencia oficial de los dos sindicatos mayoritarios, CC.OO. y UXT, anque contó cola participación de delles secciones sindicales del sindicalismu mayoritariu, casu de la representación de CCOO en Caxastur. La central d'enseñanza SUATEA y los partíos políticos PCA, PCPE o IAS, amás d'otros colectivos sociales y nacionalistes casu de Calecer, Darréu o Fusoa, qu'animó la manifestación con una furgoneta na que diba cantando'l grupu de hip-hop K'Nalón.

N'acabando la manifestación, na Plaza l'Ayuntamientu lleose un manifiestu en que se propunxo la creación d'una caxa de resistencia pa que los sindicalistes puean enfrentase al procesu llegal. La plataforma fizo mención a los demás casos de lo qu'interpreta como represión qu se dan agora mesmo n'Asturies, ente ellos la retirada de señal a Teleasturias, la situación de los trabayadores del hospital d'Uviéu o la de los trabayadores de Caxastur, protagonista de la manifestación al ser precisamente Marco Antuña, despedíu de la entidá financiera por espediente disciplinariu, l'encargáu de lleer el manifiestu final.

D'otra manera, la Xunta de Gobiernu del Ayuntamientu refugó la solicitú que fexere'l colectivu de profesionales que presentare énte'l plenu una moción de sofitu a los sindicalistes. En cuenta del testu en que se-y pidía al conceyu que solicitare l'absolución de los sindicalistes y la renuncia a indemnización, aprobóse una declaración institucional na que'l conceyu comprométese a pidir al Ministeriu de Xusticia y grupos parlamentarios una modificación del Códigu Penal qu'entorne l'endurecimientu de penes de la reforma penal del añu 2000.