"Na Fonte" de Rossaleda Jazz, meyor cantar n'asturianu nos Premios de la Música

El cantar "Na Fonte" del grupu Rossaleda Jazz Quartet, foi el ganador na categoría de "meyor cantar n'asturianu" dientro de los Premios de la Música que tolos años concede l'Academia de la Música. Al galardón, que s'entregó ayeri de nueche nuna gala celebrada en Córdoba, taben nominaos los temes "Cuando Naide lo ve" del compositor y cantante Toli Morilla y "un pasu alantre" single que grabare'l "colectivu de músicos pola oficialidá" como tema promocional pa la Xunta pola Defensa de la Llingua Asturiana.

Dende l'añu 2004, l'asturianu cuenta con un premiu propiu dientro d'estos galardones que reconocen a los meyores de la industria musical española a lo llargo del añu. Otres llingües minorizaes del estáu tienen tamién categoríes propies, y asina'l ganador na estaya de meyor cantar en Catalán/Valencianu foi Joan Manuel Serrat por "Cremant Núvols", mientres que'l ganador n'Euskera foi "Hiri" de Kepa Junkera. La meyor pieza en gallegu del añu foi pal Xuráu de l'Academia "Nunca mais" del grupu Cómplices.

´D'otra manera, la gala de los Premios reconoció a otros músicos asturianos n'otres categoríes. El xixonés Nacho Vegas ganó xunto col músicu Enrique Bunbury na categoría de meyor discu de rock alternativu pol so trabayu conxuntu "El tiempo de las cerezas" mientres que'l cantante Melendi recibió'l premiu a la meyor xira del 2006.