Noemí Martín va pidir la celebración d’un congresu estraordinariu en pasando les elecciones

La dirixente d'Izquierda Xunida Noemí Martín declaró ayeri que se siguía teniendo por secretaria xeneral del PCA dempués de la repetición del VIII congresu de la organización que se celebrare'l pasáu sábadu n'Uviéu avalada pola directiva del PCE, opuesta a la corriente mayoritaria n'IX d'Asturies, y na que Martín foi destituyida, nomándose pal so cargu a Francisco de Asís

Martín aseguró que l'actu del sábadu "al que nun pue llamase congresu", confirmó "un güelpe d'Estáu col aval d'una minoría que secuestró les sigles históriques del PCA".

Noemí Martín dio una rueda de prensa acompañada pola mayoría de los representantes de los Comités Locales del PCA, sacantes les asamblees de Llangréu, Uviéu, L.lena, Noreña, Morcín y Siero. Toos ellos firmaron una resolución na que manifiesten la so "refuga más fonda énte la manipulación de la opinión pública fecha por parte de los dirixentes del PCE y de la minoría del PCA" y nel que refuguen la repetición del VIII Congresu, que-yos abulta "una agresión intolerable a la federalidá" polo que dio anuncia de que van solicitar la celebración d'un congresu estraordinariu en pasando les elecciones.

Dende la otra parte en conflictu, los conceyales de l'agrupación d'Izquierda Xunida n'Uviéu y representantes del sector críticu del partíu, Roberto Sánchez Ramos y Celso Miranda, declararon que la decisión d'IX de crear una xestora que lleve l'agrupación d'Uviéu y que faiga una llista electoral pa la capital asturiana ye "antidemocrática y un cuartelazu" calificando a la xestora de xunta militar". Los dirixentes históricos d'IX n'Uviéu declararon que van celebrar una asamblea ciudadana abierta'l vienres na que van esplicar a los sos votantes y simpatizantes los sos argumentos.