La RTPA presentó los sos primeros programes n’asturianu

El Director Xeneral de la Radiotelevisión del Principáu d'Asturies, José Ramón Pérez Ornia, presentó ayeri la primer programación n'asturianu de la canal de televisión pública asturiana. Nel trescursu del actu Ornia esplicó que l'ente va entamar a doblar al asturianu los cuentos del programa "Presta a esgaya" no que "podría ser el guañu d'una escuela de doblaxe" n'Asturies dalgo que xustificó en cuantes que "toles comunidaes que tienen idioma yá tienen escuela de doblaxe".

Ornia emponderó la importancia del doblaxe, que dixo que pue "potenciar el llabor educativu" usándose les pieces como material didácticu".

Tocante a los espacios n'asturianu que van estrenase na TPA, estos van ser ocho, y mientres que dellos van tener periodicidá diaria, otros van emitise selmanalmente. Trés d'estos espacios van tener identidá propio, concretamente 'Pieces'; 'Nós' y 'Camín de Cantares', mientres que los otros cinco "A Galmiaes" "Recetes con cuentu" "La Risión" "Xente de Casa" y "Axenda d'Asturies" van inxerise dientro del magacín de la tarde "Con dos de azúcar'. El director de la TPA , que tuvo acompañáu nel actu por Antón García, Próspero Morán y Ramón Lluis Bande, responsables de dellos d'estos espacios, desplicó que los programes van emitise cola técnica de multidifusión, de manera que'l públicu pueda velos en día y hora distintos del que s'emitieron y asina "captar un público oxetivu de toles edaes y clases sociales y contribuyir al usu del asturianu respondiendo a les necesidaes d'una audiencia específica".

D'otra manera, ornia recordó que la radio de la RTPA emite yá ocho espacios n'asturianu y dio anuncia de la creación, d'equí a poco d'una estaya n'asturianu dientro de la web del Ente

D'otra manera, los empleaos de la TPA manifestáronse a les puertes de les instalaciones del Ente en protesta por un conveniu dignu. La movilización tien llugar a pocos díes de que la TPA viva'l so primer paru, convocau pal vienres.