Educación refúga-y un escritu a un maestru por tar n’asturianu

La organización sindicalñ d'enseñanza SUATEA denunció que la Conseyería d'Educación refugó-y a un maestru la presentación d'una orde de comisión de servicios por tar redactada n'asturianu.

El casu que denuncia SUATEA asocedió-y a Xosé Nel Comba Paz, maestru itinerante de llingua asturiana del Centru Rural Agrupáu "Cabu Peñes". Según esplica'l sindicatu, el trabayador descubrió con sorpresa la devolución de la so fueya de "itinerancies" un conceptu que fai referncia a les dietes que se paguen a los maestros que, por motivos de la estructura de dellos centros, tienen que desplazase ente escueles. El maestru presentare l'escritu n'asturianu y recibiólu de vuelta refugáu y incluso retocáu a bolígrafu en castellanu sobre'l testu orixinal en castellanu polos funcionarios del serviciu de xestión económica, dalgo que dende Suatea calificóse de "chulería".

La organización sindical, que da anuncia de que va poner el casu en manes de los sos servicios xurídicos, asegura que'l so afiliáu tien reconocíu'l derechu a unviar documentos a l'alministración n'asturianu gracies a la Llei d'Usu y Promoción del Asturianu de 1998 y interpreta la situación como un ataque que supón de fechu, "l'afitamientu de la situación de discriminación reaccionaria, sistemática y caciquil de los usuarios d'asturianu" énte l'alministración asturiana.