L'independentismu quebequés pierde terrén tres de les elecciones del llunes

El Partíu Lliberal de Quebec (PLQ) ye'l ganador de les elecciones celebraes esti llunes nesti país del Canadá, acordies colos primeros sondeos que-y dan al 66% del escrutiniu, el 32% de los votos. El trunfu del PLQ, y, sobremanera, el segundu puestu del partíu conservador nacionalista Acción Democrática de Québec (ADQ), que desplaza al independentista Partíu Quebequés al tercer puestu nel arcu parlamentariu del Canadá francófonu, alloñen la posibilidá d'un nuevu referendum pola independencia dempués de los celebraos nel 1980 y nel 1995, que los independentistes tuvieron nun tris de ganar.


Con estos resultaos, el Partíu Lliberal del Québec llograría sobre 46 diputaos de 125, baxando muncho sobre los 74 que tuvo nel 2003. Acción Democrática de Québec quedaría a mui poca distancia col 31% de los votos y alredor de 43 diputaos, xubiendo espectacularmente respective a los 5 que tenía hasta agora. El Partíu Quebequés (PQ), col 29% de los votos y 36 escaños, sufre tamién una perda grande de votos y d'escaños, baxando dende los 46.