La Coordinadora Ecoloxista denuncia los niveles de contaminación de Mieres

El grupu de defensa del mediu ambiente Coordinadora Ecoloxista asturiana tuvo accesu a los últimos datos de contaminación del conceyu de Mieres, qu'apurren valores que-y abulten escesivos a la entidá ecoloxista. Acordies coles midiciones oficiales, Mieres perpasó los niveles de protección a la salú en partícules en suspensión en 75 días del añu y presentando una concentración media nel aire d'estes partícules tamién penriba de lo que consiente la llei. La Coordinadora denuncia igualmente los altos niveles d'óxidu de Nitróxenu, un axente que causa problemes alérxicos y qu'agrava toa frasca d'enfermedaes respiratiries y del que se doblaron los topes consentíos por llei.

La Coordinadora píde-y al Ayuntamientu de Mieres que "asuma les sos responsabilidaes y trabaye para que se reduzan estos niveles de contaminantes" qu'asegura que vienen d'una "industria consentida y un traficu conxestionáu". Los ecoloxistes apunten a la central térmica que quier construyise en La Perea como una grave amenaza pal futuru que va aumentar los niveles de contaminación de Mieres.