Los sindicatos organicen una manifestación contra la criminalización

"Representantes de los sindicatos CCOO, CSI, SUATEA, CGT, CNT y USO comparecieron ayeri en rueda de prensa pa reclamar l'asistencia a la manifestación que baxo'l títulu ""Contra la criminalización de les lluches sindicales y sociales"" va celebrase'l próximu 22 de xineru en Xixón.

L'oxetivu de la convocatoria ye denunciar los procesos penales abiertos a trabayadores que defenden los sos puestos de trabayu, según esplicaron los sindicalistes. El representante de CNT n'Asturies y Lleón, Gerardo Fernández, denunció qu'instituciones y empreses ""méten-yos mieu a los trabayadores pa que nun acudan a les fuelgues y pa que nun reclamen los sos derechos"". Pela parte de la CSI, Juan Manuel Martínez Morala punxo como casu evidente d'esta situación a un trabayador de Juliana, José Antonio Rodríguez Bobes, al que-y piden cinco años de cárcele y 40.000 euros por defender el so puestu de trabayu , sorrayando que'l d'esti obreru yera namás un casu ente los munchos qu'hai n'empreses como Naval Xixón, Thyssen Airport o Mina La Camocha.

La convocatoria, que robla prácticamente tol panorama sindical sacante la UXT y delles centrales minoritaries, va pidir l'anulación de tolos procesos penales a trabayadores y sindicalistes en procesos por defender los sos puestos de trabayu y la derogación de los artículos del Códigu Penal que criminalicen l'actividá sindical y la movilización social, xunto col puntu 3 del artículu 315 del Códigu Penal que criminaliza los piquetes y la propaganda de fuelga con pena de tres años. El portavoz de la USO, Francisco Baragaño aclarió al respective que ""los trabayadores que defenden el puestu ""nun somos terroristes nin salimos a semar el terror"" . La manifestación va salir el día 22 a les siete y media de la tarde de la Plaza l'Umedal de Xixón."