Xunta Moza valora en positivo la fuelga nos institutos d'esti xueves

La organización Xunta Moza calificó mui positivamente l'alcance de la fuelga convocada ayeri nos institutos de secundaria d'Asturies en defensa d'una situación digna pa la enseñanza del asturianu. Dende la organización convocante aseguren que la fuelga "consiguió implicar a la mocedá estudiante na defensa de la llingua asturiana y de los sos derechos llingüísticos y educativos" y afirmen que'l grau de siguimientu de la fuelga foi "mui altu en toa Asturies" anque lóxicamente mayor ente los estudiantes de 3u y 4u de la ESO qu'ente los de los primeros cursos de la ESO, onde les edaes son mui curties.

Xunta Moza asegura que "les direcciones de dellos centros ficieron lo posible por facer fracasar la fuelga, amenazando con apercibimientos, faciendo exámenes y incluso en dellos casos unviando circulares a les families avisando de que nun se daríen por xustificaes les faltes d'asistencia". Los datos de siguimientu de la organización falen de más d'un 90% de paru en Llanes y Cangues d'Onís y d'un 85% en Llanera, el Valle del Caudal, con mayor siguimientu en Turón y menos en Mieres o L.lena, onde s'anduvo pel 65%. N'Uviéu hebo institutos que pararon dafechu mientres que n'otros la convocatoria nun pasaría del 60% de rempuesta, llegándose al 80% n'IES como los de Candás o Lluanco.

Coleutivos de Mocedaes Comunistes, Conceyu Universitariu pol Asturianu, Mocedá d'Andecha Astur, Mocedá d'Izquierda Asturiana y Xuventú Asturianista sofitaben esta convocatoria que se fexo nun momentu d'especial tensión pol tratamientu llegal que se-y da a l'asignatura d'asturianu na redacción de los currícula de primaria y secundaria, mui perbaxo de la voluntá d'organizaciones asturianistes y sindicatos d'enseñanza, qu'aseguren que l'asignatura queda peor de lo que taba enantes d'entrar al curriculum.