La conseyera de Mediu Rural asegura qu’Asturies foi la comunidá onde más xubió l’agricultura ecolóxico

La conseyera de Mediu Rural y Pesca, Servanda García, presentó ayeri na Xunta Xeneral del Principáu les llinies maestres del Plan d'Agricultura Ecolóxico 2007 - 2009. Na so intervención, García esplicó qu'Asturies foi la comunidá autónoma onde más espoxigó l'agricultura ecolóxica a lo llargo del añu pasáu, ganando un 36 por cientu de superficie en superficie y un 32 por cientu n'operadores.

Acordies colos datos de la Conseyera, el Conseyu de la Producción Agraria Ecolóxica (COPAE) tien rexistraos un total de 169 operadores contra los 128 del 2005, de los que 148 son productores, 41 ellaboradores y 17 comercializadores. Según estos mesmos datos, la superficie ficie total conseñada a esplotaciones d'agricultura ecolóxico ye de 3.279 hectárees, un reblagu importante contra les 173 que funcionaben nel añu 2000. Tocante al plan d'Agricultura Ecolóxico, Sevanda García adelantó que va tener una financiación de 14,7 millones d'euros y apuntó como principales oxetivos del mesmu'l desarrollu de les producciones agrícola y ganadera ecolóxiques; la meyora de la comercialización y venta d'estos productos y la formación del sector, ente otres.

El plan llevó les crítiques del diputáu del PP, Ramón García Cañal, que pidió que se concretare l'esfuerzu presupuestariu en materia d'ayudes a productores. Tamién apuntaron crítiques al Plan dellos colectivos implicaos nel mesmu qu'emitieron les sos valoraciones sobre'l documentu. Pela Unión de Cooperatives del Principáu d'Asturies (UCAPA) el so presidente Eduardo Alvarez esplicó que faltaba información a los consumidores y qu'ello podría llevar a que los consumidores vieren los productos ecolóxicos como "caros". Tamién criticó'l plan el presidente del Conseyu de Producción Agraria Ecolóxica (COPAE), Javier González, que se declaró "escépticu" ente les sos posibilidaes y que pidió que nun se centrare tanto na ganadería. El presidente de Coordinadora Asturiana d'Agricultura Ecolóxica (CADAE), Santiago Pérez, llamentó que'l plan llegare dempués de que se perdiere un tiempu valiosísimu que llevó al avieyamientu y despoblación del mundu rural, y, anque s'enfotó en que suponga "un cambeu radical" pidió más dotación económica. La falta de presupuestu del Plan criticola tamién la representante de la Coordinadora Ecoloxista d'Asturies, Patricia Redondo.