Caliao, protagonista nel Día Mundial del Agua

La seca, la sobreesplotación de los recursos o la mala xestión de los mesmos y la medra de la población del plantea tán convertiendo l'agua potable nun problema d'escala global que s'agrava pasu ente pasu a cada añu. La ONU, coincidiendo cola celebración del Día Mundial del Agua, alvirtió que pal añu 2025 el 60% de la población mundial va vivir en lugares onde l'accesu a esti recursu imprescindible va ser enforma abegosu. Xunto col datu de la ONU, el Conseyu pal accesu al agua y los recursos alvirtió que son cerca de 1.100 milones de persones les que nun tienen un accesu amañosu al agua y que, en munchos más casos l'agua carez de los tratamientos sanitarios precisos, polo que tolos años muerren dos millones de rapacinos por enfermedaes rellacionaes col agua ensin tratar.

L'agua ye motivu tamién de reivindicaciones, actos institucionales y protestes n'Asturies alredor d'esti Día Mundial. D'esta miente, la Coordinadora asturiana d'ONGDs dientro de la so campaña ¿Quién debe a quién? llama a la ciudadanía a reivindicar l'abolición de la delda esterna y la restitución de la delda ecolóxica, denunciando qu'una de cada tres persones nel mundu nun tien accesu al agua potable. La Coordinadora denuncia tamién les polítiques de privatización del agua, afalaes dende instituciones como'l Fondu Monetariu Internacional.

Xunto con estes reivindicaciones, la Plataforma de Defensa del Parque Natural de Redes organiza esti fin de selmana en Caliao unes xornaes sobre la nueva cultura del agua y contra'l proyectu del embalse pal altu Nalón. El programa d'actividaes, que va desarrollase nel pueblu casín, va entamar el sábadu a les 18 hores con una charra del profesor Martínez Gil, Vicepresidente de la Fundación Nueva Cultura del Agua. Tres d'ella van actuar los músicos Xuacu Amieva, Anabel Santiago, Daniel García de la Cuesta, Xavier Gómez y Xosé "Ambás" pesllando'l día una sesión de narraciones colos autores Montserrat Garnacho, Esther Prieto y Emilio Gastón ente otros. Les xornaes van siguir el domingu 25 con rutes guiaes pel desfiladeru de Los Arrudos.