El PP d’Avilés pide unes ordenances de protección d’hórros y paneres nel conceyu

El Partíu Popular d'Avilés propunxo-y ayeri al conceyu que redacte una normativa que garantice'l caltenimientu de los más de 120 hórros y paneres catalogaos nel conceyu. El conceyal del PP p'asuntos urbanísticos, Constantino Alvarez, y la responsable de Cultura de la formación, Carmen Vega, afirmaron que ye preciso "acabar col vaciu" existente sobre estes construcciones, y sorrayaron que "al revés de lo que pasa con otros edificios catalogaos", estes construcciones tradicionales "cuerren riesgu de desapaición" al nun tar previstos llegalmente'l so desmontaxe y treslláu.

Alvarez punxo'l casu d'una panera asitiada n'avenida de Santa Apolonia que se desmontó pa facer obra nuevo. El conceyal afirma que'l desmontaxe de la panera fízose ensin licencia d'obres anque tuviera un informe favorable de treslláu de la dirección de Patrimoniu del Principáu".

Los representantes del PP esplicaron que, al nun haber normes específiques, la panera de Santa Apolonia pue treslladase a otru conceyu, polo que piden que se redacten unes normes qu'obliguen a que los horros que se desmonten nun se lleven fuera d'Avilés y a que, en casu de que'l propietariu nun tenga onde asitiar l'horru, esti se lleve a parques públicos y zones verdes del conceyu "como pasa nel casu d'Uvieu". El PP avilesín pide tamién que les normes sobre horros y paneres comprometan tamién a los propietarios a caltener los horros y reparalos cuando sía preciso.