La crisis ente IX y PCA lleva a una doble convocatoria pa esti sábadu

La dirección d'IX d'Asturies convocó al so Conseyu Políticu pa esti próximu sábadu 24, coincidiendo cola repetición del VIII Congresu del Partíu Comunista d'Asturies, y na que va tratase'l nomamientu d'una xestora pa que lleve'l control de l'asamblea local d'Uviéu, conceyu onde ta'l guañu del sector críticu cola dirección d'IX que forzó la repetición del congresu del PCA, organización perteneciente a la coalición Izquierda Xunida.



El Conseyu Políticu d'IX va entamar el sábadu a les 9:30 nel Atenéu de La Calzada de Xixón, media hora dempués del entamu del congresu del PCA, que va facese na Facultá d'Económiques d'Uviéu. La doble convocatoria supón un pasu más nel enfrentamientu ente PCA y IX dempués de que'l PCE decidiere repitir la convocatoria del congresu autonómicu atendiendo a les protestes de los críticos uvieinos, sector qu'encabeza Francisco Asís.

En rempuesta a les actuaciones de la organización uvieina, los responsables asturianos d'IX decidieron proponer la creación d'una xestora pa l'agrupación d'Uviéu. Esti puntu va ser ún de los más importantes d'un orde del día que tamién acuta tiempu pa falar del programa pa les elecciones autonómiques y el nomamientu de candidatos.

La "tercer vía" dientro d'IX, corriente que tien abondante representación en Llangréu y qu'encabeza'l candidatu a l'alcaldía d'esti conceyu Xandru López, declaróse sorprendida pola doble convocatoria que calificó de "esquizofrenia total".

Otramiente, la Presidencia d'IX d'Asturies tuvo ayeri una reunión na que se dio parte del incumplimientu, por parte de trés asamblees locales de la coalición, de los pautos electorales fimaos col Bloque por Asturies y Los Verdes. Trátase de los conceyos de Llangréu, Samartín del Rei Aureliu y Uviéu. Estos asuntos van tratase tamién nel Conseyu Políticu del sábadu.