La Xunta Moza quier parar los institutos asturianos esti xueves

La Xunta Moza, estaya de mocedá de la Xunta pola Defensa de la Llingua Asturiana, presentó esta mañana la convocatoria de fuelga na enseñanza asturiana que tien fecha pal próximu xueves 22 de marzu. "en rempuesta a la nueva agresión que supón la propuesta de currículu de la Conseyería d'Educación pa secundaria, qu'afonda na situación yá marxinal de la llingua asturiana nel sistema educativu". La convocatoria de paru xeneral nos institutos de secundaria asturianos, que ta puesta pal día 22 de marzu, va acompañada d'una concentración ales 12 del mediudía na Plaza d'España, énte les oficines de la Conseyería d'Educación.

La Xunta Moza quier adelantase cola fecha de la convocatoria a la fecha prevista pa qu'Educación asoleye'l curriculum de secundaria, calteniendo asina la presión sobre l'organismu responsable de polítiques educatives d'Asturies dempués de la manifestación del pasáu 17 de febreru contra'l borrador de currículum d'enseñanza primaria, nel que l'asignatura d'asturianu apaecía prácticamente como una optativa en competencia con otres materies curriculares. Xunta Moza yá organizare nos últimos años dos fuelgues na secundaria asturiana en defensa d'una meyor situación de l'asignatura d'asturianu. Dende la organización entienden qu'esta vegada hai más motivu p'aparar los institutos.


Les organizaciones de mocedá Mias, Mocedá d'Andecha Astur, Coleutivos de Mocedaes Comunistes, Xuventú Asturianista y Conceyu Universitariu pol Asturianu sofiten esta iniciativa, que ye yá la tercer fuelga na enseñanza qu'entamen les mocedaes de la Xunta Pola Defensa de la Llingua, que, pela so parte, prepara movilizaciones en coordinación colos sindicatos d'enseñanza al respective de la situación del asturianu nel curriculum.