"Allende" diz que nun va devolver l'acta de conceyal a IAS

" El conceyal del Ayuntamientu de Piloña, José Ángel García Fernández, 'Allende', que foi suspendíu por 5 años de militancia pola formación Izquierda Asturiana, manifestó en declaraciones a l'axencia Europa Press que nun tien intención de devolver l'acta de conceyal a IAS, que lu acusó de tresfuguismu y d'enclicase énte la voluntá del PSOE de Piloña. ""Allende"" aseguró que los problemes con IAS entamaron ""20 minutos dempués del escrutiniu electoral"" y adelantó que ""dende'l pasáu 18 de xunu, fecha na que me proclamaron conceyal del Ayuntamientu de Piloña, ya me consideraba fuera d'esti partíu"" una afirmación que se tien en que al actu de proclamación ""namás asistieron miembros de l'agrupación d'IAS de Piloña"". ""Allende"" asegura que los motivos daos por IAS pa suspendelu, ""son mentira"" y llamentó que la formación ""faiga despreciu"" a la so persona al entender que foi'l so comportamientu personal una de les causes de la sanción. Tocante a la esixencia de devolver l'acta, ""Allende"" aseguró que ""la mio acta pertenez al pueblu de Piloña y a naide más, polo tanto esta petición nun tien sentíu, nin la voi atender"". El conceyal, qu'agora va pasar al grupu mistu, denunció sentise ""vixiláu, presionáu y obligáu a dar parte al partíu de cada movimientu, ello cuando, desque que me proclamaron conceyal, ellos diéronme de llau"". El conceyal aseguró contar col apoyu de l'agrupación del partíu en Piloña.

En rempuesta a les declaraciones del conceyal, IAS emitió una nota de prensa na que'l secretariu xeneral d'IAS, Faustino Zapico, asegura que ""a pesar de les historias pa nun durmir que cuenta l'ex - conceyal d'Izquierda Asturiana"" el procedimientu pol que se-y suspendió de militancia ye ""rigurosamente llegal"" y que yera ""daqué totalmente necesario énte una situación insostenible na qu'Allende actuaba al marxe del partíu y de l'agrupación, ensin informar de lo que facía, ignorando les indicaciones del partíu y la so política, actuando de forma caciquil, y guiándose polos sos intereses personales, dalgo intolerable nun partíu como Izquierda Asturiana, pequeñu pero de principios mui claros que'l señor Allende debería conocer y acatar cuando decidió entrar a militar"". Los responsables d'Ias y Asturianistes alvirtieron del entamu d'acciones llegales contra'l conceyal si sigue usando'l nome de les sigles poles que salió escoyíu y, tocante al apoyu de l'agrupación, afirmaron que ""nun tien que ver el comprensible apoyu d'unos amigos con una agrupación política"" al empar que llamentaron ""la falta de información, que por razones ayenes a la dirección del partíu, pudiera sirvir como escusa pa recabar l'apoyu delles persones de bona fe a les que se-yos esmucieron datos sobre esti procesu""."