El PSOE perdió otra votación na Xunta Xeneral por una moción sobre l’AVE

El PSOE perdió por tercer vegada en tola llexislatura una votación na Xunta Xeneral del Principáu. Les comunicaciones esteriores d'Asturies, asuntu pol que IX-BA y FSA-PSOE francieren por primer vegada la disciplina de votu, naquella ocasión a cuentu del portalgu de l'Autopista del Güerna, foi otra vuelta'l puntu de choque ente los dos grupos parlamentarios.

Una proposición non de llei presentada por IX-BA esixéndo-y al Gobiernu que-y pida al Ministeriu de Fomentu que l'AVE llegue a Asturies nel año 2009 foi esta vegada la causante de la francedura de la unidá de votu que llevó a la derrota socialista na cámara al amestase los votos de PP y IX-BA. El portavoz del PSOE, Fernando Lastra presentare una enmienda non alimitida a la proposición na que se retiraba'l plazu de tiempu del 2009, asegurando que yera "físicamente imposibe" que l'AVE llegare a Asturies nesi plazu. El diputáu d'IX-BA Aurelio Martín acusó a los responsables del Ministeriu de Fomentu de tratar l'AVE Madrid - Xixón con "frivolidá". Martín aseguró que l'estudiu informativu pal trazáu ente L.lena y Xixón llegare trés años dempués de que'l PSOE llegare al Gobiernu central y esplicó que nun-y paecía "serio" nin "responsable" que l'estudiu tenga un plazu de dos años.