Una llei obliga a los polacos a declarar si collaboraron col réxime comunista

Tolos ciudadanos polacos nacíos enantes del añu 1972 tienen la obligación dende ayeri de declarar si collaboraron col gobiernu comunista que gobernó'l país hasta l'añu 1989. Cientos de miles de profesionales arriesguen el puestu de trabayu y podríen quedar inhabilitaos por diez años en casu de dar testimoniu en falso o nun declarar. Son cerca de 700.000 les persones, mayoritariamente funcionarios, profesores d'Universidá y periodistes, los que tienen que declarar d'equí al 15 de mayu.

El gobiernu conservador del primer ministru Jaroslav Kaczynski va contrastar los testimonios de los declarantes colos archivos de l'antigua policía comunista al traviés d'una institución nueva creada a tal efectu, l'Institutu de la Memoria. La entrada en vigor d'esta nueva llei llevantó la protesta de medios de comunicación, organizaciones y persones particulares, siendo que la llei podría quedar anulada pol Tribunal Constitucional de Polonia. El Tribunal Européu de Derechos Humanos ta tamién investigando la llegalidá d'esta polémica midida.