Un archipiélagu finlandés amenaza con refugar la Constitución Europea

L'archipiélagu d'Aaland, que tien estatus de territoriu autónomu de Finlandia, amenazó con refugar la Constitución Europea en casu de que Finlandia nun-y ceda ún de los 14 escaños que tien nel Parlamentu Européu.

Aaland votare al favor d'amestase a la UE nel añu 1995 xunto con Finlandia, pero caltién delles ventayes fiscales que quier que sigan nun futuru. Pa ello, Aaland reclama tener asientu nel europarlamentu y el derechu a contar con representación propio na Corte Europea de Xusticia.

Casu de nun facese casu a la so solicitú, Aaland refugaría la Constitución Europea. Anque'l non d'estes islles a la Constitución Europea nun tenga efectu llegal, el debate en Finlandia ta encesu. El parlamentu finlandés diz que nun ye xusto da-y un asientu en Parlamentu Européu a una autonomía de 27.000 habitantes cuando Finlandia tien 14 escaños pa 5,2 millones d'habitantes, a razón d'un por cada 375.000 habitantes. Aaland ye la rexón más rica de Finlandia y una de les más riques de tola UE. Anguaño, cuenta con representación nel Comité de les Rexones, anque namás de tipu consultivu.