L’Observatoriu de Política Llingüística denuncia faltes nes polítiques de promoción del asturianu

L' Observatoriu de la Política Llingüística, organismu consultivu de la Oficina de Política Llingüística d'Asturies formáu por escritores, llingüistes y persones representatives de la vida cultural asturiana, emitió ayeri'l so balance de los cuatro años de llexislatura que tán p'acabar. Nestos años, l'Observatoriu detecta "insuficiencies" anque tamién se congracia del "esfuerzu" realizáu dende l'Alministración asturiana por normalizar l'asturianu.

Los escritores Ismael González Arias y Taresa Llorences foron los encargaos de presentar les conclusiones del Observatoriu nuna rueda de prensa que tuvo llugar n'Uviéu y na que se comentó, na parte negativa del balance, la falta de midíes empobinaes a la visualización de la la llingua asturiana na publicidá, comunicación y imaxen institucionales. La falta de reconocimientu de la especialidá d'asturianu pal profesoráu non universitariu y el que la llingua tenga una "presencia escasa" na televisión pública tamién apaecen ente les faltes del procesu normalizador. L'Observatoriu reconoció igualmente que'l cumplimientu efectivu de la Llei d'Usu del asturianu alcuéntrase "con dificultaes" y denunció la "inestabilidá" de los servicios de normalización nos conceyos.

Taresa Llorences identificó como causa d'estes faltes la falta d'enfotu énte'l fechu llingüísticu" por parte de les élites polítiques asturianes, sorrayando la debilidá del alcuerdu de gobiernu PSOE- IX/BA nesta materia, xunto con "inercies" de calter alministrativu y social, unes inercies que se conocen en que la sociedá paez conformista cola situación actual, dalgo qu'atribuyó a que l'asturianu nun tenga entovía'l prestixu que precisa. Xunto cola inercia negativa de les élites polítiques, l'Observatoriu alvierte tamién de la existencia d'un "sector duru" del asturianismu, que refuga cualquier avance parcial na materia.



Na parte positiva, a lo llargo de la llexislatura 2003-2007, los miembros del observatoriu sorrayen el consensu "ensin precedentes" na Xunta Xeneral del Principáu a la hora d'aprobar el Plan de Normalización Social del Asturianu, la oficialización de la toponimia asturiana y la creación de la Rede de Normalización Llingüística nos conceyos, amás de la xuba del 20% nel presupuestu añal de la Oficina de Política Llingüística.

Con vistes al futuru, los responsables del Observatoriu reclamaron la oficialidá como "una necesidá pa garantizar una política llingüística efectiva" y pidieron que l'actual Oficina de Política Llingüística xuba de rangu pa convertise nuna Direección Xeneral coordinada coles conseyeríes de Cultura y Educación, pidiendo que s'aclarie'l repartu
de funciones institucionales na materia, pa terminar cola "confusión ente funciones polítiques y d'asesoramientu llingüísticu.