Los trabayadores del Hospital d'Oriente anuncien que'l paru pue ser indefiníu si nun s'atiende a les sos demandes

"El comité d'empresa del Hospital del Oriente, celebra mañana a les 13.00 hores una asamblea na que los trabayadores van valorar la primer selmana de fuelgues y van estudiar les midíes a tomar pal futuru, tal y como comunicó Covandonga Tomé, la presidenta del Comité d'empresa del Grande Covián, en declaraciones a l'axencia Europa Press. ""Si nun hai una respuesta per parte del Principáu, siguiremos nesta situación y pue que de manera indefinida"" matizó Covadonga Tomé nun análisis de la situación.

Los trabayadores del Hospital de Les Arriondes aseguraron qu'amás de les tres xornaes de paru convocaes pa la próxima selmana los díes 21, 23 y 25 ""si les coses siguen igual, van convocase más díes"". ""Tamos cansos d'esti xuegu de los políticos y nun vamos parar hasta que s'escuche'l nuesu pidimientu porque hai 10 años que llevamos lluchando por ello"", matizaron. Que l'hospital de la comarca oriental seya consideráu pola Conseyería de Salú como'l restu d'hospitales, ye una vez más la reivindicación que la plantiya del Grande Covián esixe, y pola que mañana va celebrara la so tercer xornada de fuelga. Respecto al final d'esti conflictu, la vocera de los trabayadores avanzó que van abandonar esta fuelga cuando seyan escuchaos los sos pidimientos. ""Nun vamos abandonar esta situación por nada a cambiu, porque hai que solucionar el problema d'esti hospital y que los ciudadanos del oriente tengan los mesmos derechos en materia de sanidá que los del restu de la rexón"", dixo. El comité defendió una vez más, el carácter apolíticu d'esti paru de los trabayadores. ""Movilizar a 200 trabayadores pa meyorar les sos condiciones y les de los sos pacientes, nun entiende de signos políticos"", finó Tomé."