L'asociación "La Quintana" celebra los Alcuentros cola Tradición Oral

Los próximos díes 17 y 18 de marzu, del 2007 van celebrase en Xixón los segundos "Alcuentros cola Tradición Oral" qu'entama la Escuela de Música Tradicional La Quintana, col sofitu del Taller de Músicos de la Fundación Municipal de Cultura, Educación y Universidá Popular, del Ayuntamientu xixonés y el Xardín Botánicu.

La tradición oral como puntu de referencia del folclor y la importancia de caltener viva la tresmisión oral de la cultura centren estos Alcuentros pelos que van pasar diferentes persones que, cantando acompañaos de dalgún instrumentu, o cenciellamente contando hestories, van demostrar a los asistentes los vehículos de la tresmisioón oral y les enseñances qu'aporta. Amás de cuntar cola presencia de persones rellacionaes coles tradiciones que s'atopen n'Asturies, nos Alcuentros van participar persones veníes d'otros llugares, ente ellos músicu y folclorista aragonés Ángel Vergara Miravete.

Los Alcuentros entamen el sábadu 17 nel Atenéu Obreru de La Calzada cola intervención de Jesús López Suárez, investigador y responsable del Archivu de la Tradición Oral, que va presentar, con videos y audiciones, parte del trabayu que lleva faciendo a lo llargo de los últimos años. Nesa xornada van tomar parte tamién Xosé "Ambás", investigador etnográficu asturianu, Dani García de la Cuesta, de "LA Quintana" y Ángel Vergara Miravete, investigador y músicu aragonés, anque la mayor novedá de la xornada va ser la presentación del vídeu "Xente de La Quintana" trabayu fechu por dellos alumnos y alumnes de la escuela.

Al día dempués, domingu 18 de marzu, nel entornu del Xardín Botánicu de Xixónva celebrase un conciertu didácticu entituláu "Cuando suena la maera" una actividá que va completase a la 1 y media col gran conciertu nel que va intervenir l'alumnáu y profesoráu de la E.M.T. La Quintana tocando delles melodíes y pieces del repertoriu tradicional. Nesti actu qu'echa la pesllera a los Alcuentros va presentase'l CD Xente de La Quintana, complementu al vídeu y fechu tamién por alumnos de la escuela col oxetivu d'esparder del so llabor didácticu.