Los sindicatos d'enseñanza denuncien la perda de places na educación asturiana

"Los principales sindicatos d'enseñanza asturianos emitieron ayeri durísimes protestes énte la tisoria que l'alministración asturiana va aplicar na enseñanza asturiana y que va llevar, según esplicaron les mesmes organizaciones sindicales, a la perda de más de 220 puestos ente primaria, secundaria y FP. Asina, el sindicatu Suatea, primer fuerza sindical na enseñanza non universitaria, alvirtió que van perdese 220 places que van afectar a tolos conceyos, pero especialmente a los de les cuenques mineres y zones rurales. Asina, Suatea denunció que l'alministración cuenta con zarrar la escuela d'Eilao y unviar a tolos sos escolinos a Bual ""a una distancia de 42 kilómetros de carreteres males"". P'agravar la situación, SUATEA alvirtió qu'escueles que nes primeres propuestes d'educación nun perdíen puestos, sí que presenten supresiones na última propuesta, casu del CRA La Coroña de Nava. Les asignatures que más places pierden según informó SUATEA van ser Xeografía y Historia (16), Llingua Castellana y Lliteratura (14), Física y Química (14), Educación Física (11), Tecnoloxía (11), Matemátiques (11) Música (10), Dibuxu (10) y Inglés (10), llegándose en dellos IES a rebaxase la plantiya docente nun 15% ello, según el sindicatu, dempués de que l'alministración asegurare que la reducción lectiva que s'espeya na LOE nun diba traducise en perda d'empléu . Suatea fizo un llamáu a toles fuerces polítiques y sindicales asturianes par que ""impidan l'atropellu"" qu'este gobiernu pretende culminar la próxima selmana nel Conseyu de Gobiernu.

Pela so parte, CC.OO tamién refugó la propuesta de la Conseyería d'Educación de plantiyes docentes. Según informó'l sindicatu al traviés d'una nota de prensa, la propuesta de reducción en Primaria pasa de 25 a 15 puestos, 11 menos que la ufierta inicial y nel casu de Secundaria pasen de 159 a 111 places. Según CC.OO, el plan presentáu sigue perbaxo de les necesidaes reales de funcionamientu de los centros públicos, queda lloñe de los criterios establecíos nos Alcuerdos de Plantiyes y nun introduz suficientes midíes que baxen los cambios horarios derivaos de l'aplicación de la LOE que provoquen reducciones horaries en dalgunes especialidaes. ""La nueva propuesta nun da respuesta a les principales alegaciones presentaes por CC.OO al existir en funcionamientu en dalgunos centros hasta cuatro o cinco grupos más de los que se definen en plantiya orgánica y la desapaición que supón pa dalgunos centros l'apoyu que correspuende n'educación infantil por cada tres unidaes"". Tamién denuncia CC.OO qu'abondos centros queden col puestu de profesoráu de Pedagoxía Terapéutica compartíu y puestos de profesoráu d'Audición y Llinguaxe queden sometíos a una itinerancia ""esceicional"" en más de dos centros. Ante estos datos, CC.OO critica y refuga la política de ""coste cero"" d'esti Gobiernu que pretende aplicar tou tipu de programes ""ensin el correspondiente incrementu de profesoráu que permita abordar con garantíes los nuevos llabores que lleven consigo toes estes aiciones"".

Tamién la central CSI-CSIF considera, pela so parte, que la ""gran perda ta nos IES, onde coincide la supresión na rede pública col caltenimientu de la concertada"". Énte esta sitaución, CSI-CSIF manifestó la so crítica y el so gran pesar no qu'interpreta como ""un recorte na senseñanza que paga los malos momentos presupuestarios pelos que pasa esta Alministración""."