El DUP y el Sinn Fein xuben en representación tres les elecciones nel Ulster

El Partíu Democráticu Unionista del reverendu Ian Paisley proclamóse ayeri ganador de les elecciones autonómiques del Ulster, celebraes el pasáu miércoles. Dempués del abegosu procesu de recuentu de votos, el DUP llogró 36 de los 108 escaños que componen l'Asamblea llexislativa y el 30,1 por cientu de los votos. El Sinn Fein de Gerry Adams y Martin McGuinness afitóse como segunda fuerza con 28 escaños.



Los radicales unionistes de Paisley xubieron en seis el so númberu de parlamentarios respective a les elecciones del 2003. Pela so parte, el Sinn Fein, colos sos 28 escaños, llogra cuatro representantes más que nel 2003, y fítase col 26,2 por cientu de los votos como'l referente de la comunidá católica.

El Partíu Unionista del Ulster (UPP) de Reg Empey, ye la tercer fuerza, anque pierde nueve diputaos baxando hasta los 18, col 14,9% de los votos. La cuarta fuerza del parlamentu norirlandés ye'l partíu Socialdemócrata y Laborista, fuerza nacionalista irlandesa moderada que llogró'l 15,2 por cientu de los sufraxos. En quintu llugar, con siete escaños, quedó'l partíu Alianza, formación qu'amiesta a católicos y protestantes.
Otres fuerces con presencia n'asamblea autónoma van ser el Partíu Unionista Progresista (PUP), venceyáu a grupos paramilitares protestantes y el Partíu Verde. La participación foi del 63,5%, y la campaña electoral centróse en temes non rellacionaos col réxime de soberanía de la provincia, siendo ún de los pegoyos de la mesma'l nuevu impuestu sobre l'agua.



Les elecciones d'esta selmana foron el primer pasu pa despesllar la situación ente católicos y protestantes. Republicanos y Unionistes comprometiéronse'l mes pasáu a formar un gobiernu conxuntu. Si nun son a ello primero del 26 de marzu, el gobiernu d'Irlanda del Norte va pasar a manes directes de Londres y Dublín.

Ver equí resultaos de les anteriores elecciones nel Ulster