La Xunta Pola Defensa de la Llingua esixe que l'asturianu entre nel curriculum d'infantil

"La Xunta pola Defensa de la Llingua Asturiana esixó, al traviés d'un comunicáu, la inclusión de la materia de llingua asturiana, nel Currículu d'Educación Infantil, amestándose asina a les protestes feches públiques pol sindicatu SUATEA dempués de dase a conocer el borrador d'esti documentu pola Conseyería d'Eduación. La organización señaló que'l documentu provisional fechu públicu dexa una ""presencia"" testimonial a esti idioma, al que ""rebaxa a una cuarta categoría"".

La Xunta esplicó que ""la única mención clara que se fai al asturianu ye l'anexu, onde se fala de les árees que se toquen n'educación, y al referise al área del llinguaxe, la mención al asturianu ye vaga, calificándolu na introducción como elementu de la cultura y pidiendo un tratamientu globalizáu desarrollando actitudes positives hacia la conocencia d'elementos básicos de comunicación"". La nota señala tamién que ""nel apartáu de conteníos, dempués de tratar estes llingues, fálase tamién del respetu hacia otres llingües y tamién hacia l'asturiana"". ""Como se pue ver la referencia al asturianu ye de cuarta categoría: primero'l castellán, dempués la llingua estranxera, dempués otres llingües, y pa non face-y un feu, l'asturianu"", añade la nota. Pa la Xunta, el documentu ""ignora una realidá viva en toles escueles como ye la presencia del asturianu nos más pequeños"", señalando que ""en llugar d'encarar una cuestión tan fundamental, el documentu escapa d'ella como si fuera un tabú"".

La organización señala tamién que'l borrador ""incumple disposiciones llegales como la Llei d'Usu y l'articuláu del Estatutu d'Autonomía d'Asturies, onde s'espresa sin dudes la existencia del idioma y onde s'obliga a entamar aiciones qu'ayuden a la so normalización"". ""Tamién s'olvida l'alcuerdu de Plantiyes d'Educación Infantil y Primaria del Principáu d'Asturies, onde queda recoyío que va dotase d'un especialista de llingua asturiana a tolos centros"". El colectivu conclúi dexando claro que ""estes midíes tán preparando'l camín pa que la llingua tenga cada día menos presencia na sociedá asturiana a lo llargo de les etapes educatives"". ""Eso faise arrincándola pel raigañu de los planes educativos de los alumnos más pequeños, onde ye más necesaria; siguiendo con un tratamientu d'asignatura 'maría' nos más xóvenes, y sólo naquellos centros onde se da; y acabando pola falta d'una especialidá universitaria""."