CCOO píde-y al Gobiernu que busque fórmules para que TeleAsturias siga emitiendo

El sindicatu CCOO d'Asturies pidió-y al Gobiernu asturianu que busque fórmules pa permitir que TeleAsturias siga emitiendo con normalidá, anque la emisora nun llograre nenguna de les llicencies de TDT qu'entregó'l gobiernu asturianu, que la selmana pasada dio orden a la sociedá Retevisión de que cortare la señal de la emisora asturiana, que dexó de vese'l pasáu vienres a la 1 de la tarde.

Nún comunicáu en que CCOO d'Asturies califica la decisión de cortar les emisiones de TeleAsturias de "desafortunada" el secretariu del sindicatu Antonio Pino reiteró'l sofitu de la so organización a la plantiya de la canal y aseguró que la emisora "lleva años demostrando de sobra la so pluralidá" y que ye "la más vista n'Asturies". CCOO asegura que, si realmente hebo daqué deficiencia nel proyectu presentáu por Tele Asturias ello pue iguase habiendo voluntá de les partes.

El conseyeru d'Economía y Alministración Pública, Jaime Rabanal, declarare que TeleAsturias tendría que facese con una llicencia nuna futura revisión del actual Plan Técnicu de Televisión Dixital pa emitir de forma llegal y que, en casu de de que la emisora emitiere ensin llicencia produciríase una "situación illegal".