Cándido y Morala, absueltos nel segundu xuiciu poles movilizaciones del Naval

El xulgáu de lo Penal númberu 2 de Xixón, presidíu pola xueza Rosario Hevia, absolvió a los sindicalistes de la Corriente Sindical d'Izquierda (CSI) Cándido González Carnero y Juan Manuel Martínez Morala nel segundu xuiciu al que s'enfrentaben los dos representantes llaborales polos daños materiales causaos nes protestes del astilleru Naval Xixón nel añu 2004. La fiscalía pìdía pa los dos sindicalistes una pena de dos años y mediu pola quema d'una furgoneta na vía pública.



Esta sentencia ye inversa dafechu a la que recibieren Cándido y Morala nel primer xuiciu poles movilizaciones del naval, nel que se-yos acusaba de quemar una cámara de control de tráficu y nel que'l xuez Lino Rubio emitió sentencia condenatoria por trés años de presidiu. Los dos sindicalistes declararon que diben recurrir esta sentencia énte'l Tribunal Superior de Xusticia d'Asturies. Morala y Carnero declararon que la sentencia ye "un eslabón más de la trama política y policial que criminaliza les protestes llaborales pa trancar l'astilleru y construir pisos de luxu".