El PP define de "auténticu fracasu" les llistes d'espera del Sespa

"El diputáu del Partíu Popular na Xunta Xeneral del Principáu, Carlos Galcerán, calificó güei de ""auténticu fracasu"" los resultaos del 'Informe de zarru de llistes d'espera quirúrxica 2007, presentáu esti llunes pola xerente del Serviciu de Salú (Sespa), Elena Arias.

Según Galcerán ""nun se cumplió nengún de los tres oxetivos"" del Gobiernu autonómicu pal añu pasáu. El responsable 'popular' nel área sanitaria recordó que nos presupuestos del 2007 marcábense tres oxetivos en materia de llistes d'espera. En primer llugar, eliminar la llista d'espera de más de seis meses; en segundu casu, disminuir el númberu de pacientes qu'esperen más de 91 díes al 20 por cientu; y, finalmente, reducir la demoranza media a menos de 50 díes. Al respecto, Galcerán fizo insistencia en que ""nun se cumplió nengún de los tres oxetivos"" y apuntó qu'hai 52 pacientes en llistes d'espera de más de seis meses a finales del 2007; el númberu de pacientes de más de 91 díes d'espera asítiase nel 25,05 por cientu; y la demoranza media caltiénse en 64 díes, al igual que nel 2006 y 2005.

Anque'l diputáu popular reconoció que baxó'l númberu de pacientes qu'esperen más de 180 díes, al pasar de 207 n'avientu del 2006 a los 52 finales del 2007, destacó que'l númberu total de pacientes en llista d'espera n'Asturies al zarru del 2007 foi mui asemeyáu al del añu pasáu, con 14.866 frente a los 14.888 del 2006. Asina, pa Galcerán esti datu débese a un incrementu de recursos y derivaciones a centros concertaos, p'atayar ""únicamente"" les llistes d'espera de más de seis meses y non toes, col oxetivu de ""poder presentar datos favorables"" y non de meyorar l'asistencia. A lo qu'añadió que, seguramente, nun un par de meses la llista va volver a tener altes cifres. Nesti sen, Carlos Galcerán señaló que'l 2 de xineru'l so grupu solicitó a la Conseyería de Salú, ensin respuesta pel momentu, que presente los resultaos de toles llistes d'espera de la rede pública de Salú, dende les d'atención primaria, hasta les d'especializada, pasando poles diagnóstiques. De la mesma manera, apuntó que per primer vez, nel 2007 hai llistes d'espera n'atención primara ya qu'a los pacientes, nun altu númberu de casos, dáse-yos cita pa dellos díes dempués.

Otra de les crítiques del diputáu del PP nel parlamentu autonómicu sobre l'informe del Sespa centróse nel argumentu del Serviciu de Salú de que la mayoría de les intervenciones débense a enfermedaes dexeneratives y les altes cifres al avieyamientu de la población. Según Galcerán, dambos datos ""nun son imprevisibles"", como una pandemia, polo que considera necesariu un control de la evolución de la población asturiana y les sos necesidaes sanitaries pa dar un bon serviciu. Los procesos quirúrxicos más frencuentes son catarates, osteoporosis, venes varicoses y intervenciones d'hernia inguinal. La ciruxía xeneral ye la que rexistra una mayor demoranza, con 15 pacientes en llistes d'espera de más de 180 díes, siguida de 11 de traumatoloxía, 10 de ciruxía plástica, ocho d'uroloxía, cinco de vascular y tres d'oftalmoloxía.

Per último, Carlos Galcerán, manifestó'l so descontentu pol descontrol del Sespa ante la epidemia de gripe que rexistró Asturies a finales d'avientu y principos de xineru. ""La gripe rexístrase tolos años peles mesmes feches, sábese'l grau d'afección con que vien, y el númberu de persones vacunaes, polo que se puen prevenir los problemes rexistraos"", señaló."