El comité de fuelga del Hospital de Les Arriondes pide l'inxerimientu nel Sespa

"Una amplia representación del personal sanitariu del Hospital Grande Covián de Les Arriondes, más de 50 persones, concentróse ayeri n'Uviéu, énte la puerta pesllada de la Conseyería de Salú pa ""pidir una vez más"" la so incorporación nel Sistema de Salú del Principáu (Sespa). Ente les pancartes que portaben podía lleese 'Por una Sanidá pa toos y toes, pública y de calidá'. Amás, los asistentes glayaron conseñes como 'Conseyeru talante, Les Arriondes p'alantre'.

La presidenta del comité de fuelga del centru hospitalariu comarcal del Oriente d'Asturies, Covadonga Tomé, señaló en declaraciones a los medios de comunicación presentes, qu'esperaba poder aconceyase col conseyeru, José Ramón Quirós, o col director xeneral de Calidá y Innovación, José Ramón Riera, que ye tamién presidente del Patronatu de la Fundación Grande Covián. ""Dícenmos que nun tán y alcontramos la puerta pesllada"", llamentó la representante de los trabayadores. Tomé insistió en que l'oxetivu de la concentración ante la Conseyería de Salú ye ""el de siempre dende 1997, pidir que l'hospital seya ún más de la rede pública d'Asturies y que los usuarios del área VI tengan per parte del Gobiernu la mesma atención, y financiación, y centru hospitalariu que los demás"".

En cuantes a la fuelga entamada esta selmana pol personal del Grande Covián, Cuadonga Tomé sostién que se trata d'una decisión tomada ""dempués de munchos meses de tentar negociar per otres víes porque nun mos quedó más remediu"". ""Emburriáronmos a la fuelga"", señaló. Amás, dixo qu'una vez entamada la d'esti llunes nun recibió una ""respuesta oficial"" a la mesma. Por ello, ta previsto que sigan col calendariu de fuelga previstu, que se recupera mañana, y cuenta con seis convocatories de paru. ""Va allargase si nun recibimos más respuesta que la puerta pesllada"", añadió. En cuantes a los servicios mínimos que presta'l personal del centru hospitalariu, Tomé criticó que ""como siempre nestos conflictos son abusivos per parte de l'Alministración"", anque aseguró que se ""respeten de forma estricta y tán atendiéndose toles urxencies"". Sin embargu, Tomé dixo que ""ta quedando ensin facer tola actividá programada"" porque la planta ta apoyando la fuelga de manera ""mayoritaria"", sobre un 85 por cientu de los 280 trabayadores del hospital."