La plataforma Conceyu Abiertu pola Oficialidá presenta la III Amuesa d’Artistes Pola Oficialidá

La plataforma Conceyu Abiertu pola Oficialidá presenta estos díes n'Uviéu la tercera edición de la "Amuesa d'obres d'Arte pola Oficialidá" que se desarrolla nel Auditoriu "Príncipe Felipe" d'Uviéu cola collaboración de 99 artistes qu'apurren les sos obres de forma desinteresada a favor del reconocimientu oficial de la llingua asturiana nel Estatutu d'Autonomía.

L'apertura de la esposición, cola que colabora estrechamente la plataforma "Foru Arte Ciudá" va ser esti miércoles, 28 de febreru, a les 19.00 hores y les obres van poder visitase hasta'l 7 de marzu, día en que va facese la puya pública de los trabayos artísticos. Tolos beneficios que se llogren cola venta de les obres van dir a cubrir los costes de les campañes y iniciatives del Conceyu Abiertu Pola Oficialidá. La primer edición de l'Amuesa d'Arte pola Oficialidá, celebrada n'Avilés, recaudó más de 7.300 euros, mientres que la segunda, celebrada en Xixón les pases navidaes, recaudó más de 5.000 euros. Pa esta nueva convocatoria, ente les obres presentaes hai precios de salida na puya pa toles economíes.