La escuela xixonesa de Xove pon el so nome n’asturianu

La escuela pública de la parroquia xixonesa de Xove decidió, a pidimientu de tola comunidá escolar, poner el so nome acordies a la toponimia tradicional del llugar, sustituyendo l'actual "Jove" pola forma "Xove". Ello ye que, anque l'espediente toponímicu de Xixón permite la doble denominación Jove / Xove, a la dirección de la escuela abultó-y que yera'l momentu afayadizu pa facer oficial un nome "que ye mui popular" como diz el director del centru Francisco Javier Coalla.

La mesma dirección de la escuela de Xove foi la que planteó'l cambéu de denominación, recibiendo pa ello'l preste de l'Asociación de Padres d'Alumnos y aprobándose nel claustru por unanimidá. Pa facer efectivu'l cambéu de nome yá namás falta que la Conseyería d'Educación lu rexistre y, darréu, pasar a camudar les plaques de la fachada y emplegalu nos documentos del centru, que ye ún de los más antiguos de la ciudá.