El PP acusa al Gobiernu de pagar "illegalmente" de más a empreses constructores

"El diputáu del PP na Xunta Xeneral del Principáu, Ramón García Cañal, acusó al Gobiernu asturianu de pagar ""illegalmente"" 301.200 euros a la empresa Oca Construcciones y Proyectos pola obra del centru deportivu y d'ociu de Llangréu. Caña dixo tar ""convencíu dafechu"" de que nun ye l'únicu casu d'esti tipu. García Cañal ofreció estes declaraciones nuna rueda de prensa qu'ofreció na Xunta Xeneral del Principáu acompañáu de la tamién diputada Alejandra Cuétara.

Los políticos populares aportaron della documentación na que tienen les sos acusaciones, incluyida la relativa a un informe de la Intervención Xeneral del Principáu d'Asturies nel qu'establez nuna ""nota de reparos"" que na mencionada obra l'importe de la certificación ""sobrepasa la llende estabecida nel artículu 160 del Reglamentu Xeneral de la Llei de Contratos de les Alministraciones Públiques"". García Cañal recordó que'l preciu d'axudicación pal Centru Deportivu y d'Ociu de Llangréu y Circuitu d'Automodelismu en Lada tuvo un preciu d'axudicación de 8.953.134 euros y el total pagáu pola obra al final foi de 12.547.746 euros, con 301.200 pagaos ""illegalmente"". Atribuyó a l'actual conseyera d'Alministraciones Públiques y Vocera del Gobiernu, Anra Rosa Migoya, la orde de que'l Conseyu de Gobiernu ficiera frente al mencionáu gastu. Amás, venceyó lo ocurrío cola publación repartida peles cases y viviendes asturianes enantes de les últimes elecciones autonómiques denominada 'Construyendo Asturies' y na que se destacaben obres públiques d'Asturies. ""Qué casualidá que se trata de la mesma empresa que collaboró nesa publicación"", comentó García Cañal.

A xuiciu del diputáu popular esti casu de ""pagu indebíu"" a una empresa nun ye aisláu. Asina'l PP tien previsto solicitar na Xunta Xeneral del Principáu la declaración de responsables d'Intervención, asina como d'Ana Rosa Migoya y de los funcionarios que participaron. Amás, esta mesma selmana van llevar el casu a la Sindicatura de Cuentes y al Tribunal de Cuentes, ante lo que consideraron un ""grave fraude""."