L'IPC pieslla'l 2007 n’Asturies con una tasa del 4,1%

"L'Índiz de Precios de Consumu (IPC) n'Asturies medró nel mes d'avientu cuatro décimes con respecto al mes anterior, lo qu'asitia la tasa interañal nel 4,1 por cientu, según los datos fechos públicos pol Institutu Nacional d'Estadística (INE). A nivel nacional, l'indicador esperimentó un incrementu de cuatro décimes nel mes d'avientu respecto a payares, lo qu'asitia la tasa interanual nel 4,2 por cientu, la cota más alta dende xineru del 2006.

De xineru a avientu, la infación acumuló tamién un aumentu del 4,2 por cientu. Esta ye la segunda vez que la inflación algama'l 4,2 por cientu nesta llexislatura, tres llegar al mesmu nivel en xineru del 2006, y torna asina na cota más alta rexistrada nos cuatro años de gobiernu socialista. Asturies, cola mesma tasa de variación añal que Galicia (4,1%) ye la sesta comunidá autónoma na que menos subieron los precios, precedida por Ceuta (3%), Melilla (3,8%), Baleares (3,9%), La Rioxa (3,9%) y Madrid (4,0%). Frente a estos datos, la qu'esperimentó un mayor aumentu de precios n'avientu foi Murcia, con un crecimientu del 4,7 por cientu na variación anual. L'índiz que rexistró un mayor aumentu de preciu nel Principáu d'Asturies foi l'ociu y la cutura, con un incrementu del 1,2 por cientu con respecto a payares, debío a la subida de tarifes del viaxe organizáu. Amás, los precios de los alimentos y bebíes non alcohóliques medraron un 1,0 por cientu a causa del incrementu de los precios de los pescaos, crustáceos, moluscos, carne de vacunu, frutes fresques y quesos.

Mientres, les tarifes del Tresporte crecieron nel mes d'avientu na un 0,8 por cientu pol aumentu de los carburantes y llubricantes. Los precios de los Hoteles, cafés y restaurantes subieron un 0,6 por cientu nel mes d'avientu nel Principáu d'Asturies, principalmente pola evolución de les tases de los restaurantes, bares, cafeteríes, cantines y comedores. Tamién el capítulu d'otros subió un 0,6 por cientu. De la mesma manera, los indicadores de Menaxe esperimentaron un crecimientu del 0,6 por cientu, la Medicina un 0,2 por cientu y la enseñanza un 0,1 por cientu, al igual que les Bebíes alcohóliques y tabacu. A lo llargo del últimu mes del 2007, los únicos precios que baxaron n'Asturies respecto al mes anterior fueron los del vistíu y calzáu (-2,2 por cientu) y los de les comunicaciones (-0,2 por cientu).

El presidente de la Federación Asturiana d'Empresarios (FADE) y presidente de la Cámara de Comerciu d'Uviéu, Severino García Vigón, calificó de ""mala noticia"" pa la economía asturiana la xuba del IPC, un datu nel que ""Coincidieron dellos factores"" y señaló la necesidá de buscar soluciones y nueves fórmules pa rebaxar estes cifres. En cuantes a la dependencia española del petroleu, Vigón apuntó la posibilidá d'abrir el debate sobre la enerxía nuclear. Amás, mostróse preocupáu pola inflación española que s'asitia penriba de la media europea. ""Eso fai mal a la competitividá de los productos españoles nel mercáu esterior"", recordó'l presidente de FADE."