Los llagareros van pidir la retirada del anteproyectu de llei del alcohol

L'Asociación de Llagareros d'Asturies va pidir la retirada del anteproyectu de Llei de Midíes Sanitaries pa la Protección de la Salú y la Prevención del Consumu de Bebíes Alcohóliques por Menores, según esplicó'l so presidente, José Eloy Cortina, qu' aconceyó ayeri col coordinador xeneral d'Izquierda Xunida d'Asturies, Jesús Iglesias pa tratar esti tema, dando darréu una rueda de prensa na qu'esplicó que la futura llei ye "desproporcionada" y na que se declaró más partidariu de la retirada del anteproyectu de llei en cuenta de que se faiga una redacción más suave del mesmu. Cortina llamentó que l'anteproyectu de llei supón un balagar d'enzancos y torgues pal sector, pol que tienen un garapiellu d'empreses familiares y de pequeñu tamañu al les que les llimitaciones en cuestión de publicidá o ventes propuestes na llei van afectar muncho. Cortina afirmó que la llei va "en contra de les típiques fiestes asturianes de la sidra" y que "contradiz la cultura y la tradición asturianes".

El presidente de los llagareros dixo que'l sector al que representa ta cada día más esmolecíu en cuantes que la ministra de Sanidá Elena Salgado, "nun da marcha atrás" y pidió la "unanimidá" de tolos partíos políticos y la Conseyería de Mediu Rural pa defender a la sidra, faciendo un llamáu a escaecer les polítiques de partíu en beneficiu de los intereses de la sidra col oxetivu de facer "un frente común" na so defensa.