Asturies rexistró 41.704 puestos de trabayu nuevos nos últimos cuatro años, según Trevín

"L'aumentu del emplegu en términos absolutos nel Principáu d'Asturies nos últimos cuatro años foi de 41.704 puestos de trabayu y el relativu del 11,52 por cientu, según informó'l Delegáu del Gobiernu del Principáu, Antonio Trevín. ""Esta cifra representa un récord en cuantes a población emplegada se refier"", apuntó. El responsable del Gobiernu del Principáu declaró énte los medios na sede de la delegación acompañáu del Director Xeneral de la Tesorería de la Seguridá n'Asturies, Alfredo Cerezo, pa mostrar los datos de la Tesorería nos últimos cuatro años.

Trevín manifestó que nos últimos cuatro años ""hai más empreses y más solventes"". Nel añu 2003 existíen nel Principáu 35.642 empreses mientres que n'avientu del 2007 Asturies contaba con 39.834, lo que supón un aumentu de 4.192 empreses, ye dicir, un 11,76 por cientu. No referente al emplegu, según el delegáu del Gobiernu, el Principáu contaba con 261.886 afiliaos n'alta mientres qu'a 31 d'avientu del 2007 la Seguridá Social contaba con 403.590. Trevín señaló que demientres los últimos cuatro años, la creación d'emplegu nel Réxime Xeneral supunxo 40.624 nuevos puestos de trabayu; nel agrariu perdiéronse 3.451; nel sector domésticu 1.741; nel carbón 2.665; n'autónomos 5.840 nuevos puestos, mientres que nel réxime del mar perdiéronse 385 puestos de trabayu. Nesti mesmu sen Trevín apuntó que se produxo un aumenyu na contratación indefinida pasando de 153.043 trabayadores a 178.624 nel 2007, y en cuantes a los trabayos temporales aumentaron de 106.447 nel añu 2003 a 117.482 nel 2007.

Respecto a la recaudación, Trevín aseguró qu'aumentó un 27 por cientu nos últimos cuatro años. ""Superáronse les previsiones de recaudación, tanto nel 2006, con 104,8 millones, como nel 2007, con 82 millones hasta 1 d'avientu"". El director xeneral de la Tesorería de la Seguridá n'Asturies, Alfredo Cerezo, manifestó qu'esti organismu ye, amás, una alministración ""moderna tecnolóxicamente avanzada y atenta al usuariu"", y añadió que nel pasáu añu fueron atendíes 271.021 persones, con un tiempu mediu d'espera de tres minutos y 26 segundos."