Poetes asturianos que s'engarren col versu

Hasta'l próximu 23 de febreru ta abierta na sala "espaciu Astragal" del Conseyu de la Mocedá de Xixón la esposición "El desafío" ganadora del VII Premiu Astragal del
Principáu d'Asturies. L'amuesa, qu'organiza'l colectivu "ropa tendida" parte de la idea de que "La poesía nun ye un conxuntu d'idees intocables y sagraes" en cuantes que ye "de quien tien falta d'ella". La esposición, cola poesía de protagonista, inclúi doce retratos de poetes asturianos vistíos de boxeadores y posando como si tuvieren entrenando o si fueren a engarrase, acompañando a cada retratu un poema del autor nuna metáfora ente l'arte de componer versos y l'engarrase coles palabres y la realidá faciendo de la poesía un combate.

Ente los autores retrataos hailos qu'escriben en castellanu y n'asturianu, rescamplando David González, Miguel Rojo, Ana Vanessa Gutiérrez o Pablo Texón.

El fotógrafu David Feito, el realizador Juan Tizón, los técnicos Ricardo Santana y Guillermo Tuñón, l'actor Tato Loché, los grafistes Pedro Castro y Diego Muñiz, y la escritora Sofía Castañón son los responsables d'esta esposición que cuenta, amás, cola collaboración del músicu y profesor del Conservatoriu d'Uviéu Miguel Fernández pa la creación de la base sonora qu'acompaña la muestra.