Llagareros y profesionales de la sidra van aconceyar con Sanidá pol testu de la llei del Alcohol

Un grupu de destacaos profesionales del sector de la sidra aconceyó ayeri n'Uviéu pa dar una rueda de prensa na que refugaron el borrador d'anteproyectu de llei de Midíes Sanitaries pa la Protección de la Salú y la Prevención del Consumu de Bebíes Alcohóliques por Menores.

La Xerente del Conseyu Regulador de la Sidra, Reyes Ceñal, el presidente de l'Asociación de Sumilleres d'Asturies, Ceferino Cimadevilla y el presidente de l'Asociación Hostelera d'Asturies, Alfredo García Quintana, foron los encargaos de tresmitir l'esmolecimientu de los profesionales del sector por esti testu que podría suponer un güelpe mui duru, acordies cola so redacción actual, pa la cultura de la sidra asturiana, afectando a la venta de sidra nes romeríes y a tradiciones del país como les espiches.

Anque'l Gobiernu asturianu yá dio anuncia de que diba presentar alegaciones al anteproyectu de Llei.

La representante del Conseyu Regulador de la Denominación d'Orixe de la Sidra, Reyes Ceñal, dio anuncia de que'l sector "va aconceyar pa tratar el problema" y de qu'una delegación con representantes d'Asociaciones de Sidreros, de Llagareros y del mesmu Conseyu Regulador van dir a Madrid pa tener una reunión nel Ministeriu de Sanidá col oxetivu de "llegar a un alcuerdu". Pela so parte, Ceferino Cimadevilla definió'l testu llegal como "una aberración pal sector", mientres qu'Alfredo García Quintana quitó-y fierro a la situación asegurando que "nun hai que crear alarma en cuantes que, pel momentu, solo ye'l borrador d'un anteproyectu". El representante del sector hosteleru esplicó que'l so sector ta "esmolecíu pol consumu d'alcohol ente menores d'edá y señaló que "anque hai qu'intentar que nun baxe la edá d'aniciu a la bebida, nun tien por qué influyir nel consumu responsable por parte de los adultos".