15 muertos en Gaza

"Polo menos 15 palestinos, na so mayoría armaos, morrieron ayeri nel cursu d'una operación del Exércitu israelín en Gaza, na que supón la peor matanza sufrida pol Movimientu pa la Resistencia Islámica (Hamas) en más d'un añu. Pela so parte, un voluntariu ecuatorianu, trabayador d'un kibbutz israelí próximu a la Faza de Gaza morrió por disparos d'un francotirador palestín cerca de la muria fronteriza. L'atentáu foi reivindicáu por Hamas.

Fontes médiques y de Hamas aseguraron que los 15 palestinos --12 miembros d'Hamas, aparte d'un milicianu d'otra formación y dos civiles-- morrieron n'enfrentamientos col Exércitu israelín nel norte de la Faza de Gaza y nel este de la ciudá de Gaza. Israel aseguró que l'oxetivu de la operación yera acabar col llanzamientu de cohetes escontra territoriu israelí dende la Faza. ""Hubo una masacre escontra'l nuesu pueblu y al mundu decímos-y que'l nuesu pueblu nun va permanecer en silenciu ante estos crimes"", declaró a la prensa'l presidente de l'Autoridá Palestina, Mahmud Abbas, en Ramala (Cixordania). Pela so parte, el presidente israelín, Simón Peres, declaró que mientres sigan disparando cohetes dende Gaza, a Israel ""nun-y va quedar otra opción que responder y acabar con ello"". ""Ésti ye ún de los resultaos de la visita (el presidente d'EE.UU, George W. Bush)"", quien ""animó a los israelís a matar al nuesu pueblu"", declaró un altu dirixente de Hamas, Mamud al Zahar. El fíu d'ésti morrió nun intentu fallíu de les fuercies israelís por acabar con él. Aparte, nel kibbutz Ein Hashlosha, cercanu a la Faza de Gaza, un home que trabaya nuna granxa cerca de la muria que dixebra Israel de los territorios palestinos morrió pol disparu d'un francotirador palestín, esplicó a israel Radio'l xefe de seguridá d'esta comunidá xudía. El muertu tenía 20 años y procedía de Quito (Ecuador)."