El Ministru d’Industria promete collaborar con Asturies nuna planta p’atropar CO2

Asturies podría ser la primera comunidá del Estáu n'entamar una instalación p'atropar y almacenar dióxidu de carbonu (CO2), gas causante del efectu invernaderu. El ministru d'Industria, Turismu y Comerciu, Joan Clos, declaró na so visita ayeri a Asturies la predisposición del Gobiernu a participar y collaborar nel proyectu d'investigación de captura de CO2 que se ta llevando alantre l'Institutu Nacional del Carbón (Incar) basáu na carbonatación del gas, que Clos emponderó como una posible referencia europea y que los investigadores del centru asitiáu n'Uviéu aseguren que mengua enforma los costes de retención del Co2 pa que nun llegue a l'atmósfera. El presidente asturianu Vicente Álvarez Areces anunciare'l pasáu mes de xineru la creación d'esta instalación nun proyectu conxuntu nel que participaríen, amás del Incar, la Universidá y delles empreses, ente elles Hunosa y HC-EDP.

Tocante al futuru de les ayudes públiques al carbón, el ministru recordó qu'España tien un contenciosu cola Unión Europea (UE) por esti tema y que "hai dificultaes pa ver cómo vamos a siguir sofitando esta industria n'acabando'l plan actual nel 2011". Con too y con ello, Clos reivindicó la importancia del carbón como "una reserva estratéxica" d'enerxía.


Más información na web del INCAR