IAS suspende de militancia al so conceyal en Piloña

"La organización política Izquierda Asturiana anunció ayeri la suspensión de militancia por 5 años del conceyal del Ayuntamientu de Piloña, José Angel García ""Allende"", al que-y esixó la entrega del so acta de conceyal. Casu de que García nun devuelva l'acta, la formación píde-y al Grupu Socialista, col que se firmare un pautu de gobiernu pol que Camilo Montes (PSOE) accedió a l'alcaldía y José Angel García quedó como teniente d'alcalde, que faiga cumplir el Pautu Antitresfuguismu suspendiendo l'alcuerdu.

Pa esplicar esta decisión, adoptada por IAS el pasáu sábadu, Faustino Zapico, secretariu xeneral d'IAS, dió una rueda de prensa, acompañáu de Santiago Artime, conceyal d'Andecha Carreño, Patricia Teja, conceyal d'Asturianistes por Nava, y d'Inaciu Llope y Germán Abad, candidatos nes pasaes elecciones asturianes nes listes de la formación Unidá. de la qu'IAS ye parte. Zapico esplicó que la decisión, tomada pola Comisión de Garantíes y Sanciones del partíu, nun se debe al pautu de gobiernu col Partíu Socialista, sinon ""esclusivamente al incumplimientu, de forma evidente, pública y notoria de múltiples puntos de los estatutos del partíu"" por parte del conceyal"" y de puntos del programa electoral, xenerando una actitú que ""compromete tanto la credibilidá d'IAS como la del proyectu políticu d'Unidá nel conxuntu d'Asturies"".

Zapico esplicó nesti sentíu que García ""nun informaba nin daba parte al partíu del so llabor nel Ayuntamientu "" y que tomó ""una serie de decisiones qu'incumplen l'alcuerdu de Gobiernu y que van contra'l programa electoral d'IAS"". Zapico refirióse nsti sentíu al compromisu ""incumplíu"" de ""poner a disposición pública'l proyectu de la llinia d'alta tensión Soto-Penagos, y a l'aprobación del reglamentu de Xuntes Vecinales del conceyu, ún de los puntos básicos del programa electoral"" que Zapico esplicó que ""Allende apoyó ensin consultar primero la redacción del testu col so partíu"". Zapico aseguró que José Angel García ""Allende"" yá nun ta autorizáu pa falar nel nome d'IAS o nel d'Unidá y sorrayó que la so elección foi'l resultáu del trabayu ""del conxuntu del partíu, del que ya nun forma parte, y de los sos socios, Asturianistes y UNIDÁ, a los que yá nun pertenez tampoco"". Dende IAS asegúrase que, cola so actitú, García convertióse el solu ""nun rehén del PSOE"".

Pela so parte Inaciu Llope definió a ""Allende"" como ""un conceyal más del Partíu Socialista, que nun desarrollaba nengún tipu de política alternativa, puntu básicu del proyectu d'Unidá"" y denunció que, por causa d'ello ""el séptimu conceyal ta saliéndo-y de baldre al PSOE"". Ello ye que'l PSOE gobierna Piloña colos sos seis conceyales y l'apoyu de 'Allende', contra los 6 del PP, que foi la llista más votada.

IAS aclaria que nun se sanciona a Allende por pautar col PSOE sinon polos incumplimientos reiteraos pa col so partíu, y recuerden qu'esta decisión nun tien que ver ""cola necesidá de facer un pautu d'izquierda pa sacar al PP del Ayuntamientu"". Por ello ofrécen-y al PSOE ""desarrollar verdaderamente el pautu de gobiernu en Piloña, si decide nun contar cola aportación d'un tresfuguista"", en referencia a José Angel García. LLope adelantó que dende IAS nun hai enfotu en que José Angel García ""Allende"" devuelva l'acta de conceyal y apeló nesti casu al cumplimientu del Pautu Antitresfuguismu pa evitar que'l conceyal siga como parte del equipu de gobiernu en tal casu."