Riopedre garantiza pal próximu cursu la creación de 65 unidaes d'infantil y primaria y otres 27 de secundaria

"El conseyeru d'Eduación, José Luis Iglesias Riopedre, garantizó pal próximu cursu la creación de 65 unidaes d'infantil y primaria y otres 27 de secundaria. Riopedre fizo estes declaraciones a los medios de comunicación con motivu de la presentación del conveniu del nuevu currículu d'educación infantil. El responsable autonómicu reiteró que tolos centros asturianos van contar el próximu cursu colos docentes necesarios pa ""impartir una enseñanza de calidá"", énte les crítiques de dellos sindicatos pola supresión d'unidaes.

A entrugues de los medios de comunicación sobre la negociación de les plantilles orgániques que nesti momentu ta desarrollándose. José Luis Iglesias Ripedre insistió en que nel Principáu hai un profesor por cada ocho alumnos, ""una cifra que ta bien perbaxo de la media nacional"". El titular d'Eduación señaló que les plantilles orgániques representen sólo una parte de les plantilles totales de los centros y apuntó que'l próximu cursu van crease polo menos 65 nueves unidaes n'Infantil y Primaria y otres 27 en Secundaria. ""Falar nestos momentos de cifres concretes tien poco valor; sicasí, puedo dicir que'l númberu d'unidaes que se van suprimir n'Infantil y Primaria va ser mui similar a la cifra de les que se van crear"", afirmó. Nesti sen, el Conseyeru añadió qu'hai zones que van esperimentar un claru aumentu del profesoráu, como l'área central d'Asturies. En cuantes al númberu d'alumnos, Riopedre recordó que dende'l cursu 2005-2006 los alumnos d'Infantil y Primaria crecieron en 2.556 na rede pública, mientres que nel mesmu periodu baxaron en 2.808 en Secundaria.

Sobre'l nuevu currículu que'l Conseyeru d'Educación y Ciencia presentó ante los representantes de unos 300 centros educativos Riopedre señaló que'l nuevu decretu establez per primer vez la ordenación d'esta etapa de la enseñanza y favorez que de magar los cuatro años los neños puean entamar a estudiar una llingua estranxera y empiecen a usar tamién los hábitos de llectura, la escritura y les habilidaes numbériques. Amás, Ripoedre indicó que'l Principáu realizó los trámites pa que'l segundu ciclu de la Educación Infantil seya de baldre, tal y como establez la Llei Orgánica d'Eduación (LOE), tanto nos centros públicos como nos concertaos.

El documentu presentáu pol titular d'Educación respuende a les llinies definíes na LOE y persigue llograr un desarollu integral y armónicu de los neños en tolos planos. Los centros educativos nel usu de la so autonomía pedagóxica van ser los encargaos de completar y aplicar el currículu, asina como d'organizar les actividaes docentes y les formes de relación ente los integrantes de la comunidá educativa, de manera que faciliten el desarrollu integral de los pequeños.

Los conteníos curriculares de la Educación infantil organícense sobre tres árees concretes que son la conocencia d'un mesmu y l'autonomía personal, conocencia del entornu y llingües. Los tres apartaos representen campos d'aición vinculaos y inspiraos polos mesmos principios pedagóxicos, orientaos a xenerar el placer d'esplorar, esperimentar y conocer ente los más pequeños. En dambos ciclos de la Educación infantil la evaluación va ser global, continua y formativa."