El Gobiernu disuelve les Cortes y convoca elecciones pal 9 de marzu

"El presidente del Gobiernu, José Luis Rodríguez Zapatero, anunció ayeri la disolución oficial de les Cortes y convocó elecciones xenerales pal 9 de marzu, nun discursu nel que fizo un balance mui positivu de la llexislatura y centráu nos avances económicos y sociales. ""La llexislatura que güei acaba punxo de manifiestu qu'aquellos propósitos ficiéronse realidá, fui fiel a la mio pallabra"", declaró Zapatero refiriéndose al so programa pa les elecciones del 2004.

El presidente del Gobiernu destacó que l'Executivu gozó d'una fuerte estabilidá que-y permitió poner en prática compromisos políticos y que se vio tamién acreditada, afirmó, pola aprobación de cuatro Presupuestos Xenerales del estáu. No que se refiere a los llogros económicos, Zapatero sorrayó que se crearon tres millones de puestos de trabayu y que nesti momentu existe la tasa de paru más baxa de la democracia, amás de superar la media europea en renta per cápita. Sobre los temes sociales, fizo especial mención a l'aprobación de midíes como l'atención a dependientes, la ñacencia de fíos, la subida de pensiones y sueldu mínimos y les ayudes pal accesu a la vivienda. El xefe del Executivu destacó tamién la llei qu'aprueba'l matrimoniu ente persones del mesmu sexu por suprimir ""discriminaciones odioses pa tolos ciudadanos"". ""Tenemos una gran país, somos un gran país, merecémosnos el meyor de los futuros y tamos pareparaos pa ello"", afirmó Zapatero, qu'añadió: ""siéntome fuerte, dalgo más que fuerte, más motiváu que nunca""."