L'ADBA perdió en Madrid col Canoe

"L'ADBA perdió en Madrid col Canoe pol resultáu de 71 a 59. El partíu tuvo igualáu hasta'l descansu, al que se llegó con un 37 a 34, pero dempués foi determinante que les locales garraran una ventaya mayor nel marcador, de nueve puntos a lo cabero'l tercer cuartu, y nel últimu periodu llegaron a tener hasta catorce puntos, sofitandoesa separtación nel marcador nel so xuegu con ataques que desendolcaben bien ceo y nel aciertu nel tiru esterior, que la defensa en zona de les asturianes nun yeren a parar.

Con esta derrota les avilesines siguen quintes na clasificación -fuera de les places que dan drechu a xugar pol ascensu-, puestu nel que yá teben enantes de xugar esti partíu, pero empataes a siete victories con otros trés equipos. Coles asturianes yá nun xugo Katarina Sandorcinova, que foi cortada enantes de descansu navidiegu,y tán pendientes de contratar a otra base pa cubrir el puestu de la eslovaca.

Les xugadores más destacaes de l'ADBA foron Verónica Alonso (13 puntos, 5 rebotes y 4 asistencies), Dace Cinite (11 puntos y 6 rebotes) y Anna Boleda (16 puntos y 4 rebotes). Nes madrileñes hai de destacar el gran partíu de Marta Balnes (28 puntos, con 7 triples de 8 intentos, garró 8 rebotes y tuvo la meyor valoración del alcuentru con 29 puntos)

Ficha técnica:

Moguerza Real Canoe N. C.: Sofía Ramalho (5), Laura García (15), Sheila Mangada (3), Marta Blanes (28) y Antionette Wells (15). Tamién xugaron: María Piera, Sabrina Sánchez (2), Almudena Manzano (3) y María Isabel Bonilla.

ADBA: Anna Boleda (16), Orinta Kavaliaskaite (6), Iratxe Cabrera (2), Jerica Watson (8) y Dace Cinite (11). Tamién xugaron: Verónica Alonso (13), Esther Mesa (3), Paula Ballvé, Jana Stantienova, Debora Abreu y Teresa Riera.

Árbitrios: Juan Pedro Morales y Francisco Martín. Nengún de los dos equipos tuvo xugadores eliminaes por cinco faltes personales. Partíu de la decimosegunda xornada de la Lliga Femenina 2 Grupu A, xugáu nel Pabellón del Pez Volador de Madrid. Parciales per cuartos: 22-20, 15-14, 20-14 y 14-11."