Antonio Pino écha-yos la culpa a PP y PSOE de que nun se reformare l'estatutu

El secretariu xeneral de CCOO d'Asturies, Antonio Pino, afirmó ayeri nel tradicional balance del añu que fai la organización sindical que'l PSOE y el PP "negaron a los asturianos la reforma del Estatutu d'autonomía" ello cuando otres comunidaes "tán aprobando los suyos y amarrando financiación del Estáu" una financiación cola que tán "asegurando'l dineru que precisen pa infraestructures o pa llibrar portalgos, ello mientres n'Asturies el portalgu del Güerna subió "un 3,5% del ipc. Dientro de los conteníos que tendría de tener la reforma estatutaria, el secretariu de CCOO defendió que se reconoza l'asturianu como llingua oficial "siempre dende un puntu de vista cultural y educacional y non por intereses políticos o económicos que podríen suponer la implantación de la llingua asturiana".

Pino pidió-yos a los gobiernos autonómicu y central la creación d'un calendariu definitivo y real pa la construcción de les principales infraestructures d'Asturies y fizo un llamáu al Gobiernu asturianu a facer "una definición d'un modelu productivu de futuru que tenga la industria como pegollu principal en cuantes que "nun se pue dexase'l porvenir d'Asturies a la construcción y los servicios que son "pan pa güei y paru pa mañana".

Sobre la situación industrial, Pino llamó l'atención sobre' silenciu de la dirección de Mittal Steel sobre'l futuru de les fábriques asturianes mientres "invierte n'otros países como la India". El líder de CCOO criticó que s'acuten fondos mineros pa oxetivos que nun tienen que ver cola recuperación económica y llamó l'atención sobre'l pieslle d'empreses, ente elles Narcea Gold Mines y Autotex, que recibieron ayudes de l'alministración asturiana, polo que pidió una política de "blindamientu" d'estes ayudes. La llucha contra la siniestralidá llaboral , la falta d'inversión en I+D y la meyora del plan d'empleu mozu completaron l'analísis del sindicalista, que pidió un mayor compromisu de la entidá financiera Caxastur col desarrollu del país.